A Moms Voice (Tongan Language)

Sina has decided to put some of her thoughts in Tongan which allows her to express herself better and share her thoughts with the many Tongan readers around the world. Hopefully this is a weekly journal...   Also a picture of the Hansen Family who visited yesterday and a picture today of Tae wearing a new Beanie from Mark and Erin!

Ko e le’o ‘oe Fa’e: ‘Epeleli 18, 2006

Kou ‘a hake ‘aneuhu ‘o sio atu ki he tokoto ‘a Tae, kuo homo ‘ae ki’i mask mei hono mata (me’a fakamanava fakahauhau ki he ‘ene manava) . Pea u fakahoko pe ki he misini ‘o toe tui atu ki ai kae mohe pe. Pea te ta’utu ai pe fai ‘ema lotu mo ‘ete tangi pe kia Sihova, ke ‘omi pe ha loto lahi moha ivi ‘oku lahi kia Tae mo kita foki ke tali e koloa kuo faka’inasi ai homa loto fale

Kou manatu ai ki he ‘aho ne ma lele atu ai ki he toketa ‘I Sanuali ‘oe ta’u ni pe, ke ma’u e ongoongo ‘oku kanisa ‘a Tae, pea u pehee ange kia Tae “Manatu’I  ‘ae veesi folofola neta lau ‘aneuhu, ‘osi ai pe ‘a e palani ‘ae ‘Eiki ki manava ma’au. Pea koe palani koia he’ikai teu lava ‘e au pe ko daddy ke toe liliu, koe ‘Otua  tokotaha pe. Pea kou faka’amu ange mai teu lava keu sio hifo kihe ‘Ene palani teke a’u kiho ta’u 12 teke mo’ua he mahaki ni, pea u to’o hake au ha fo’I rubber ke lapa’I ‘aki mo talaange ki he ‘Eiki ‘oku ‘ikai keu loto au ki ai… ‘oku ke mahino’I pe Tae?” Pea koe tali ‘eni ‘a Tae he’ikai ngalo ‘iate au, “I like that mom.. that you can’t change THE plan… koia ai ‘oua toe hoha’a kiai.. he kou tui au… ko au ‘ae ki’I Siope si’isi’I hange koia he tohitapu, ‘osi atu tafa moe tafa, one after another but  I still Trust God….and have my faith in HIM”

 “Ihe ‘osi hono ki’I fai’aho ta’u 13 na’e fai ai ‘e Tae ‘ene tohi ‘one pehee, koe taha ‘ene ngaahi me’a’ofa hono birthday koe Kanisa (Cancer) pea koe me’a’ofa ‘e taha koe TUI -faith moe Malohi -strength ke tali ‘aki. ‘Io koe tui malohi ia ‘ae ki’I tama ni, pea koe fakafiemalie!

Koe ngaahi talanoa fakafiefia mo Tae pea mahino kiate au, koe founga tali lotu pe ia ‘ae ‘Eiki ke fakanonga kita fa’ee.

Talu ‘ae mahino kia Tae ‘ae toe fkalalahi ‘ene puke, mo ‘ene talamai pe ‘oku ai ‘ae Purpose pe koe taumu’a ‘ae “Eiki ma’ana ‘ihe hoko mai ‘ae me’a ni kiate ia. Neongo e lahi e faito’o ka ‘oku kei lotolahi pe ‘a Tae mo tala pe ki he taha kotoa “tau lotu pe mo lotolahi” . A’u ki he lahi ‘ae mo’ua fakafaito’o ke totongi, kae kei fakafou mai pe ‘ae founga moe tokoni mei he tapa kehekehe ‘o malava ke tapuni e mo’ua kotoa pe.

Na’e ‘a’ahi mai ‘ae faifekau ‘e taha ‘o ne pehee, “ Hannge pe ‘oku folofola mai ‘ae ‘Eiki, mou nofo pe ‘o mamata Kau  FAIVA” pea ne toe pehee “  kuo mahino ‘eni he anga e talanoa moe foaki ‘ae kakai …Ta  koho tangata tauhi pa’anga kihe faito'o 'o Tae ko Sihova pe, ‘oku NE ngaue he loto ‘oe kakai tokolahi pehe ni ke fai ha foaki,  pea ‘oku toki tuku mai pe ‘ae pa’anga he taimi ‘oku fiema’u ai”

Pea ‘oku ou fakamo’oni au ki ai, he anga ‘ae ‘ofa moe tokoni’I ‘ae si’I feinga mo’ui ko ‘eni ma’a Tae. Neongo ‘oku fou ‘a Tae he mamahi lahi, ka ‘oku 'omi pe 'e he 'Eiki 'ae kelesi fe'unga ke  ne tali 'aki. Pea toe fakaofo ‘ae nonga moe fiemalie ‘oku ma’u ‘ehe ki’I kaunanga ni. ‘IO koe ola ia 'ae falala kakato 'a e kaunanga ni ki he 'Otua pe moe ivi  ho’omou ngaahi lotu moe tokoni kuo mou fai mai ma’a Tae.

Koe ‘aho ni, kou sio ki hono ki’I faito’o hono mata ‘oku ‘ikai teu fiemalie kiai, peau kole kihe neesi fakakolo ke ha’u sio kiai (koe 'atunga pe ia 'ae  hoha’a fakafa’e) pea fai ai ‘ae fetu’utaki kihe toketa fai tafa, pea fekau kema foki ange kihe clinic ‘a pongipongi ke sio kiai. Hau he faingata’a kiate au he taimi ‘oku te fetongi ai hono ngaahi faito’o, kate sio kihe ngaahi faka’ilonga he lahi e tafa ne fai ki hono sino, peate pehee loto pemo 'ete faka'amu ke ngata pe aa mu’a heni.

Neongo ‘oku si’i malimali mai moe ‘ikai ha nifo ‘olunga… ‘oku kei tatau pe kiate au koe fa’e ‘ae faka’ofo’ofa ‘I tu’a mo loto he mo’ui ‘a Tae! Pea neongo kotoa e 'otu tafa ni, he'ikai  lava 'eha taha ke to'o 'ae faka'ofo'ofa he mo'ui 'ae kaunanga ni.

Koe ki’I lea ma’u ‘a Tae he ‘eke atu pe ‘oku fefee? Koe tali ai pe “Sai pe”

Kiate au koe fa’e… neongo kotoa e ngaahi me’a ni, ‘oku ‘ikai keu kei lau koe faingata’a ka kou kau fakataha mo Tae he tali  “Koe tapuaki” Pea koe ha pe me’a temau fou ai mo ‘eku tama ..

“Sai pe he ‘oku fai e fononga mo e ‘Eiki ” He kuo lava mahina ‘e 16 ‘ae fe’ao mai moe faingata’a ni, pea koe taimi lahi ai kuo ‘omi ‘ehe ‘Eiki kete teuteu fakalaumalie ke matatali ‘ae ngaahi me’a kotoa pe ‘e tuku mai he kaha’u. Koe IFO  ia ‘ete kau moe ‘Eiki, falala pe kita ki AI, he ko IA pe ‘oku ne ‘Afio’I me’a ‘e hoko ‘a pongipongi, pe koe Kovi pe Lelei.. ka ‘oku ‘ia ‘Atonai hotau ngaahi matavai.

‘Io koe fononga ni he’ikai fai ‘o fuoloa…. neongo ko ‘eku tangi mo lotu ke fakamo’ui ‘a Tae mei he mahaki ni, Ka koe ha pe ‘ene pule… Teu ‘ahi’ahi pe ke talia ke fai Ho finangalo Ia!

‘ofa atu

Sina

Comments

[Little Tae]

WOW!!!! Sina,
There's something about the voice of a mother that pierces one's heart!!!!!! It's deep!!!! Malo Sina e vahevahe mo e fakalotolahi ki he anga e fononga 'a Tae!!! Kuo te lave monu ai pe mo kita ho fakamatala kuo fai!!!!! Ke kei hokohoko atu hono fai tapuaki mo fai mana 'a e "Me'a'ofa" kuo fungani 'aki 'a Si'i Tae!!!
'Ofa Lahi Atu,
Kava :))

[Sheil]

Sina....

Malo e vahe ho loto moe fakakaukau...Oku ou ongo'i 'a e me'a 'oku ke fou ai...kataki pe ke lahi he 'oku 'iai e fokotu'utu'u ma'a Tae. Lau koe koloa moe tapuaki 'oku 'atu ma'au mo Taholo, pea pehe ki he toenga 'o e famili. Sina, lotolahi ma'a Tae. I'll call you later on. 'Ofa Lahi Atu. Sheil

[mata,lote ,sita ,lote]

Sina,
'oku tatau mo e ha 'emau ongo'i fiefia 'i he talaloto fakafa'e kuo ke fai,,,mo'oni e lau 'a e tohi hala tau he mate pe mo'ui ka 'i ai 'a Sisu te te 'alu ai,,,sina 'oku mau ma'u ha 'ofa lahi atu mo e talamonu fakatauange ke kau 'a langi he feinga na,,, ke fakamo'ui si'i Tae mei he faingata'a kuo ne si'i tofanga ai,,,,this website is like a daily reading for us and we all pray for Tae's journey.
'Ofa lahi atu
Mata,Lote, Sita, Lote
Your students

[Nesa]

Malo e Lelei Sina

Neu lau ho tohi peau fiefia lahi ho'o tohi fakatonga. Oku lava lelei pe keu tohi fakapalangi ka na'u ki'i fakapiko'ia au he kotekote. Koe talu ete nofo he fonua muli moe kotekote peau sio hifo he website peau sa'ia ai ka na'e 'ikai keu fu'u loko mafana au koe sio hifo koe kotekote ai pe. Ikai keu toe tohi atu au ho kou pehe e au mahalo oku vale e kaume'a ni ia he lea fakatonga. Kae fakafeta'i ki he langi kuo ke tohi fakatonga mai e site peau fu'u fiefia lahi ai.

Talu eku fanongo ki he me'a ni mo eku faka'amu pe ke sai ho mo ki'i ta'ahine pea mahino mai koe faka'amu ia oku faingofua ka koe ngaue ia oku ki'i loloa, koia ai kuou 'otau e talamonu kia koe Sina pehe ki ho ki'i ta'ahine kene vave sai mai 'i hono faito'o pea kene hoko atu ai pe ene nofo moe fononga 'i he maama ko 'eni. Ke 'ia tekimoutolu ai pe 'a e Eiki o tataki ai pe homou fononga ke ola lelei e feinga oku fai.

faka'apa'apa atu

Nesa

[Lela Saafi]

Hi Sina,

Tau fakafeta'i pe ki he 'Eiki he'ene kei 'omi mo'ui ma'a si'i Tae he 'aho ki he 'aho. 'Oku ngali faingata'a pe 'a e me'a 'oku ke sio kiai he 'aho ki he 'aho ka koe 'ikai ke faingata'a ha me'a ia ki he anga 'a e vakai mai 'a hotau fakamo'ui. Ko ia Sina, 'oku mo'oni 'a Molitoni, Kalisitiane 'oua, 'oua 'e lotosi'i, neongo ho'o mo'ua he fu'u mamahi ni, tauhi ho lotolahi, tuku ho ilifia kei Satai pe 'a Satai te'eki liu 'a Ia. M'oni pe 'a Tae na'a ko ha ki'i Siope si'isi'i taha ia, na'a ko ha hanga 'e he 'Otua 'o sivi'i 'a e anga 'etau tui ka tau 'ukuma pe mo fakama'uma'u 'o tali ki he houa 'e hoko mai 'a e hau....... 'ofa atu kia Tae pea fakatauange ke hokohoko 'aho pe 'a hono kei tapuaki'i kimoutolu 'e he 'Eiki lolotonga 'a e taimi faingata'a ni.......

'ofa atu
Lela.

[LIA]

SINA TAU KAU AIPE KE FKMALO 'IA 'AE ME'A KOTOA PE,'OKU OU 'OFA ATU KIATE KOE MO TAHALO MOE TOENGA E FAMILI,PEA 'OUA NA'A TUKU TAU LOTU FAI MA'U AIPE 'OUA NA'A VAIVAI HE KOE 'OTUA 'OKU NE KEI 'I VAKA PE.LOVE U ALL.

[Maikolo Talanoa]

'Oku tau fakafeta'i ai pe neongo e faingata'a ni, Koe'uhi ko e 'Otua 'oku tau tauhi kiai 'oku lahi ia 'i he faingata'a kotoa pe.
Na'a ku lau 'a e talanoa 'o Lasalosi 'i he taimi 'e taha, pea na'aku toe fakatokanga'i pe 'a e tu'unga na'e a'u kiai 'a e ongo tuofafine, ko e 'ikai ke toe 'iai ha 'amanaki 'e toe, na'e ka'anga kotoa pe he kuo'aho e 4 'a e 'i fonualoto 'a e pekia, pea koe tu'unga ne 'iai 'ena mahino, kuo namu ha'aha'a 'a e sino 'o si'i Lasalosi. Ko e me'a na'e fiema'u 'e Sisu ia 'oku 'ikai ko e taimi, ko e ha e fuoloa, ko e ha e tu'unga, ka na'a ne fehu'i ange pe 'oku 'i fe'ia ke ne a'u kiai. Taholo mo Sina, ko Sisu koia 'oku ne 'i heni, tau falala ai pe 'o 'oua 'e tuka, tene ala mai 'o hange ko 'ene palomesi.'Oku mau 'ofa lahi atu mo e hufia mei he famili mei Ha'apai.

[Veronica Tatafu]

Hi Sina!
Hows things with the family? hope you guys are doing well :)
I just lost my babygirl two weeks ago to SIDS and it has been pretty hard trying to cope with her loss, she was only 7 months old... it still hurts, but the one thing Mum & aunty Mele kept saying to me during her funeral is to remember Tae, baby Laumanu is now an angel in heaven with Tae & Asena.
The day we buried baby Laumanu, mum whispered to me to look up to the heavens, I looked up and saw a rainbow & it was so comforting. Mum said, Tae is telling us everything is alright "walk on walk strong." Sina I've searched everywhere on the internet trying to search for answers as to why me? Why my baby... I came on here to read your blog about Gods plan and who are we to question it? Thank you Sina, Ofa atu to you and Taholo & the kids. God Bless you all!

Velonika & family.